БАРИЛГЫН САЛБАРЫН ТББ-ЫН УДИРДЛАГУУД САЛБАРТ ТУЛГАМДАЖ БУЙ БОЛОН ШИЙДВЭРЛЭХ БОЛОМЖТОЙ АСУУДЛУУДАА МОНГОЛ УЛСЫН УИХ-ЫН ГИШҮҮН, ЗАСГИЙН ГАЗРЫН ГИШҮҮН, БХБ-ЫН САЙД Ц.ДАВААСҮРЭНД УЛАМЖИЛЛАА
Монгол Улсын барилгын салбарын хувьд төр, хувийн хэвшлийн түншлэлийн хүрээнд салбарын барилгын тусгай зөвшөөрлийн олголт, мэргэжлийн сургалтын үйл ажиллагааг төрийн бус байгууллагууд нь гэрээний үндсэн дээр хариуцан хэрэгжүүлдэг бөгөөд Монгол Улсын УИХ-ын гишүүн, Засгийн газрын гишүүн, БХБ-ын Сайдаар томилогдсон Ц.Даваасүрэнтэй /2023.01.17/ салбарын 30 гаруй байгууллагын төлөөллүүдийг хүлээн авч уулзлаа.

МБҮА ТББ-ын Ерөнхийлөгч Н.Баярсайхан: БАРИЛГЫН САЛБАРТ ТУЛГАРААД БАЙГАА 250 ГАРУЙ АСУУДЛААС 25-ЫГ ЭРЭМБЭЛЭН ТӨСЛИЙН УДИРДЛАГЫН ЗАРЧМААР ХЭРЭГЖҮҮЛЭХЭЭР АЖИЛЛАЖ БАЙНА.

Та бүхэнд энэ өдрийн мэндийг хүргэе. Салбарын ТББ-ын төлөөллүүдийг цаг гарган санал бодлыг нь сонсъё гэж урьсан Монгол Улсын УИХ-ын гишүүн, БХБ-ын сайд Ц.Даваасүрэн болон яамны удирдах албан тушаалтнуудад талархал илэрхийлье. Миний бие нь МБҮА ТББ-ын Ерөнхийлөгчөөр өнгөрсөн оны 5-р сараас эхлэн ажиллаж байна. МБҮА ТББ нь 2009 онд анх үүсгэн байгуулагдсан цагаасаа хойш үйл ажиллагаагаа тасралтгүй явуулж, өдгөө бид эгнээндээ барилгын салбарын тэргүүлэгч хөрөнгө оруулагч, үл хөдлөх хөрөнгийн хөгжүүлэгч, реалтор, барилга угсралт, архитектур, зураг төсөл, барилгын материалын үйлдвэрлэгч, ханган нийлүүлэгч чиглэлийн 144 гаруй идэвхтэй үндэсний бүтээн байгуулагч гишүүн компаниудыг сайн дурын үндсэн дээр эгнээндээ нэгтгэсэн, гишүүддээ болон нийгэмдээ үйлчлэхээс гадна, төрийн  зарим чиг үүргийг бусад түншлэгчтэйгээ хамтран хэрэгжүүлж байна. 

Манай гишүүн компаниудын 70 орчим хувь нь төсөл хэрэгжүүлэгчид, үлдсэн нь зураг төсөл, архитектурын компаниуд байдаг. МБҮА ТББ нь байгуулагдсан цагаасаа эхлэн салбарынхаа хөгжлийг түргэсгэх, бизнесийн орчныг сайжруулах чиглэлээр ажиллахаас гадна яамтайгаа ил тод, нээлттэйгээр ажиллаж ирсэн. Өнгөрсөн хугацаанд ямар нэгэн шүүмжлэл гомдол тавихаасаа илүүтэй аливаа асуудлын гарц шийдлийг хайж ажиллая гэсэн зарчимтайгаар ажиллаж байгаа. Ийм учраас бид өнгөрсөн хугацаанд 3 удаагийн Стратеги төлөвлөгөөгөө хийж, байнга шинэчлэн сайжруулж мэргэжлийн консалтинг байгууллагуудтай, экспертүүдтэй тогтмол нягт хамтран ажиллаж байна. 

Сүүлийн 3 жилд манай салбарынханд хил гааль, “тэг ковид”-ын бодлогын улмаас багагүй хүндрэл тулгарч байгаа учир бид илүү эвлэлдэн нэгдэх байдлаар ажиллах хэрэгтэй болсныг харуулж байна. Үүнээс гадна, бид асуудлуудаа нэлээн гарц шийдэл хайж ажиллах хэрэгтэй гэсэн зарчмаар 4-5-хан сарын өмнө Стратеги төлөвлөгөөндөө шинэчлэлийг хийж барилгын салбарт тулгараад байгаа 250 гаруй асуудлуудыг шинжлэн судалж, түүнээсээ 25 асуудлыг эрэмбэлэн төслийн удирдлагын зарчмаар хэрэгжүүлэх нь зүйтэй гэсэн байдлаар ажиллаж байна. Ингэж ажиллахад гишүүдийн оролцоо их чухал бөгөөд зөвхөн шүүмжлээд суух биш өөрсдөө оролцоод, мэргэжлийн хүмүүсийг оролцуулаад шийдээд явах нь чухал гэдгийг гаргаад явж байна. Шинээр томилогдсон сайддаа ажлын өндөр амжилтыг хүсээд салбартаа байгаа бүх асуудлуудыг анхаарч, хувийн хэвшил, тэр дундаа идэвхтэй ажиллаж байгаа олон нийтийн байгууллага, мэргэжлийн холбоодтойгоо энэ ажиллаж байгаа хугацаандаа нэлээн гүнзгий, нягт хамтран ажиллах байх гэж найдаж байна.

Монголын Барилгын материалын үйлдвэрлэгчдийн холбооны Тэргүүн М.Түмэнжаргал: ХИМИЙН ҮЙЛДВЭР БАРИХ ХЭРЭГТЭЙ
Холбооны зүгээс 2 саналыг хэлэх гэсэн юм. Холбооны зүгээс барилгын материалын үйлдвэрийн салбар жигд явж байгаа ч 2 асуудал их дутагдалтай байна.

1. Арматур буюу гангын үйлдвэрийн асуудал жилээс жилд яригдаж байгаа ч урагшаа явж өгөхгүй байгааг анхааралдаа авна уу.

2. Энэ салбарт химийн бүтээгдэхүүн маш их хэрэглэгддэг. Гол түүхий эд нь нефть байдаг. Дорноговь аймагт нефтийн үйлдвэрийг барьж байгаатай холбогдуулан химийн үйлдвэрийг барьж эхлэхэд анхаарал тавиарай.

Монголын Зураг төсөл зохиогчдын холбооны Ерөнхийлөгч Н.Дорж: ЗУРАГ ТӨСЛИЙН ЧАНАРЫГ САЙЖРУУЛЪЯ ГЭВЭЛ МАГАДЛАЛЫН ЭРХИЙГ СОНГОН ШАЛГАРУУЛАЛТТАЙГААР ӨГӨХ ХЭРЭГТЭЙ
Манай холбоо нь 2007 онд байгуулагдсан, 140 гаруй гишүүдтэй байгууллага. Энэ уулзалтад гурван асуудал хөндье.

1. Зураг төслийн чанар муу байна гэдэг дээр олон жил ярьж байгаа ч өөрчлөлт гарахгүй байна. “Барилгын тухай” хуульд зураг төслийн магадлалд иргэн ба хуулийн этгээдийг сонгоно шалгаруулна гээд заасан байгаа. Тиймд үүнийг ажил хэрэг болгох хэрэгтэй.

2. Түншлэлийн хүрээнд барилгын яамтай хамтран зураг төслийн компаниудыг чадавхжуулах хүрээнд сургалт зохион байгуулдаг. Энэ нь хоёр газар явдаг. Архитектурын холбоо дээр бас явагддаг, үүнийг бас түншлэлийн гэрээтэй болгоод, сургалтын нэгдсэн хөтөлбөртэй болгоод нэгтгээд явах нь илүү тохиромжтой болов уу.

3. Хот байгуулалтын бодлогыг хэрэгжүүлж байгаа байдал нь маш хариуцлагагүй байна. Энэ салбарт би 35 жил ажиллаж байгаа хүн. Тиймээс бодлоготой болгож, орон тооны бүтэцтэй болгож тусгаж өгөөч ээ. Хот байгуулалт гэдэг чинь маш өргөн цогц асуудал. Өнөөдөр бидний хувьд хот байгуулалт, суурин иргэншлийн асуудал үнэхээр асуудал болж байгаа. Тиймээс энэ тал дээр анхаарал хандуулж алхам хийх хэрэгтэй байна. Боломж байгаа гэж харж байгаа.  

Монголын Барилгын инженерүүдийн холбооны Тэргүүн дэд ерөнхийлөгч Х.Мурат: ТӨР, ХУВИЙН ХЭВШЛИЙН ЭХЭЛСЭН ҮЙЛ АЖИЛЛАГААГ ДЭМЖИЖ АЖИЛЛААРАЙ
Энэ өдрийн мэндийг хүргэе. МБИХ нь 1996 онд үүсгэн байгуулагдсан, зураг төсөл, угсралт, материалын үйлдвэрлэл зэргээр ажилладаг 240 гаруй гишүүдтэй, орон нутагт салбартай, гаднын 17 байгууллагатай холбоотой ажилладаг байгууллага билээ. Өнөөдөр шүүмжлэл гэхээсээ илүүтэйгээр төр, хувийн хэвшлийн хэвшиж эхэлсэн үйл ажиллагааг дэмжиж ажиллаарай гэсэн саналыг хэлье.

Барилгын төсөвчдийн холбооны Тэргүүн Ү.Банди: БАРИЛГЫН АЖИЛЧДЫН ТАРИФТ ЦАЛИНГ НЭМЭГДҮҮЛЭХ ХЭРЭГТЭЙ
Энэ оноос эхлэн цалингийн доод хэмжээ нэмэгдсэнтэй холбогдуулан барилгын ажилчдын тарифт цалинг нэмэгдүүлэх зайлшгүй хэрэгцээ гарч ирж байна.

1. Төсвийн нормыг боловсруулж дуусгах хэрэгтэй байна.

2. Төсөв задгайгаар явж байгаа, жишиг байдлаар ч явж байгаа. Хөдөлмөрийн зарцуулалт, төлөвлөлт, судалгаа гэх мэт хийгээд явж байгаа. 

3. Сургалтын хувьд Барилгын нэгдсэн холбоотой, барилгын тусгай зөвшөөрлийн хувьд МБҮА ТББ-тай түншлээд ажиллаж байгаа. Тиймээс барилгын ТББ-ууд болон төр нь нэгдсэн бодлоготойгоор хамтран ажиллах цаашдын алхамд нь анхаараарай гэдгийг хэлэх байна.

Монголын Барилгын үйлдвэрчний эвлэлийн хорооны Дарга Б.Батцогт: БАРИЛГЫН САЛБАРЫН АЖИЛЧДЫН ХӨДӨЛМӨРИЙН НӨХЦӨЛИЙГ АНХААРАХ ХЭРЭГТЭЙ
Бид яамтай хэлэлцээрийн хүрээнд ажилладаг. Хэлэлцээрийн хүрээнд нэлээн их ажлыг хийсэн. Тэр дундаа нэг ажлыг 6 жил хөөцөлдөж байж сая 2022.12.22-нд батлууллаа. Манай барилгын салбарт 2010 оноос хойш нэг ч хийгдэж байгаагүй, одоо үүнийг дагасан стандартыг гаргах хэрэгтэй байна. Хөдөлмөрийн хөлсний доод хэмжээ нэмэгдсэнтэй холбогдуулан барилгын салбарын ажилчдын цалинг нэмэх нөхцөл байдал үүсэхээс гадна цалингийн жишиг тарифыг батлах шаардлага үүсэж байна. Мөн барилгын салбарын ажилчдын хөдөлмөрийн нөхцөлийг анхаарах хэрэгтэй байна.

Зөвлөх мэргэжилтэн, экспертүүдийн шинэчлэл холбооны Ерөнхийлөгч Л.Шагдаррагчаа: ТӨРИЙН ЗАХИРГААНЫ БАЙГУУЛЛАГА НЬ ҮНИЙГ ТОГТООХ ЁСГҮЙ
Энэ салбарт тулгамдсан, бэрхшээлтэй, шийдвэрлэгдээгүй олон жил бугшсан бодлогын шинж чанартай хэдэн асуудлуудын талаар ярих нь зүйтэй байх аа. Манай салбар 100 хувь хувьчлагдсан. Тиймээс барилгын салбарын удирдлага, зохицуулалтын асуудлууд, төрийн ерөнхий зохицуулалтаас гадна хүний амьдрах орчны аюулгүй байдалтай холбоотой техникийн зохицуулалт энэ хоёрыг яам удирдлагаараа хангаж явах ёстой. Төрийн бодлого нь хуулиараа дамжиж, техникийн зохицуулалт нь актуудаараа дамжиж амьдралд хэрэгжинэ. Барилгын суурь харилцааг зохицуулах ёстой “Барилгын тухай” хууль нь нэрээсээ авхуулаад л доголдолтой, бүхэл бүтэн бүлгээр нь хуульчлаад заачихсан харилцаа, түүнийг хэрэгжүүлэгч байгууллага нь хууль батлагдсан 2016 оноос хойш өнөөдрийг болтол хэрэгжихгүй байгаа асуудлыг жишээ болгож ярья. 

“Барилгын тухай” хуулийн 31-р зүйлд 15 чиг үүргийг хэрэгжүүлэгч агентлаг хэрэгжүүлнэ гэж зааж өгсөн байгаа. Энэ чиг үүргийг хэрэгжүүлэгч агентлагийг байгуулаагүй учраас Барилгын сайдаар томилогдсон үе үеийн хүмүүс нь төрийн өмчит аж ахуйн тооцоот газарт төрийн захиргааны байгууллагын хуулиар тусгайлан заасан чиг үүргийг шилжүүлэн өгч байна. Би БХТ-ийг шүүмжилж байгаа юм биш. Үүнээс болоод 2016 оноос хойш “Барилгын тухай” хууль чинь хэрэгжихгүй байна аа. Тэр дотор заасан 15 чиг үүргийг өнөөдөр энд оролцож байгаа ТББ-уудад нэг нэгээр нь гэрээг нь байгуулаад, эрхийг нь өгөөд хийлгэж байна. Тиймээс тэд салбарыг хөгжүүлэх биш, харин зүгээр л гэрээт ажлыг хийгээд явах сэтгэхүйгээр ажиллаж байх жишээний. Захиргааны ерөнхий хуулийн 8.1-т хуулиар тусгайлан заасан төрийн захиргааны чиг үүргийг шилжүүлэхийг хориглоно гээд заасан байгаа.

1. Сая “Зөвшөөрлийн тухай” хууль батлагдлаа. Энэ хуульд бас тэгээд заасан байгаа. Тухайлбал, ерөнхий барилгын ажилд 3 төрлийн барилгын зөвшөөрлийг өгч байгаа, МБҮА ТББ нь. Түүнийг дотор нь жижиглээд 30-40 төрлийн ажил болгоод тэр болгоноос нь тусгай зөвшөөрлийн шимтгэлийн хувь хэмжээг тогтоогоод дураараа аашилж байна. Энэ завхралыг хуулиар засах ёстой байх.

2. 2019 онд Засгийн газраас шийдвэр гаргаад салбарын төрийн бодлогын баримт бичгийг гаргасан. 6-7 сард холбогдох яам нь төрийн бус байгууллагуудтай хамтраад салбарын бодлогыг гаргаж, тэрийг хэрэгжүүлэх төлөвлөгөөг сайд баталсан. Дараа нь 8-р сард У.Хүрэлсүх Ерөнхий сайд байхдаа салбар бүрийн хөгжлийн урт хугацааны төлөвлөлт, стратегийн баримт бичгийг боловсруулсан. Тэгээд 2 үе шаттайгаар 2045 он хүртэл хэрэгжүүлэх төлөвлөгөөг гаргасан. 

Барилгын салбарын 2025 он хүртэлх баримт бичгийг баталсан. Яагаад үүнийг яриад байна вэ гэвэл эдгээр батлагдсан баримт бичгээ манай яамныхан, газар, хэлтэс, түүнийг хэрэгжүүлэх чиг үүрэгтэй байгууллагууд нь ерөөсөө ч авч үзэхгүй, шүүгээндээ далд хийчихсэн. Ийм их цаас, цаг зав үйлдвэрлүүлчхээд түүнийгээ хэрэгжүүлэхгүй байгаагаас салбарын хөгжил нь урагшаа явахгүй байна. Энэ салбарт 6 үндсэн шинэчлэлийг хийнэ гээд төрийн бодлогын баримт бичигт нь тусгасан байхад сөхөж харж байгаа хүн байгаа юм уу. Энэ бодлого, шийдвэрүүдээ хэрэгжүүлэхийн оронд өөр яамны чиг үүргийг авч ажил хийсэн дүр үзүүлж байна. Энэ явдлыг таслан зогсоох ёстой. Гэтэл манай яамны хийх ёстой зам тээврийн бүтээн байгуулалтын суурь бүтцийн, эрчим хүчний барилга байгууламжийн асуудлуудыг, тэрний норм дүрмийг нь барилгын салбар батлах ёстой, салбар дундын зохицуулалтын журам дүрэм байсаар байхад өөр яамны сайд батлаад сууж байх юм. Тэрний тусгай зөвшөөрлийг олгож байна. Энэ салбар дундын ойлгомжгүй асуудлуудыг Сайд та одоо нэг талд нь гаргах хэрэгтэй. Сая “Стандарт, техникийн зохицуулалтын тухай” хууль гарсан. Энэ хуулиар салбарын яамд дэргэдээ Техникийн зохицуулалтын хороотой байх ёстой. Гэтэл энэ хороог одоо хүртэл байгуулаагүй. Тэгээд юм ярихаар төрийн өмчит БХТ рүү чихээд байх юм. БХТ бол аж ахуйн тооцоотой компани. Үнэхээр цааш нь ажиллуулмаар бол, төрийн чиг үүргийг хэрэгжүүлмээр бол хариуцсан шиг хариуцуулмаар байна. Нэг бол хувийн хөгжлийн компаниудтай зэрэгцэж бизнес хийдэг байгууллагыг компани болгох хэрэгтэй.

3. Үнэ бүрдэл: 1976 онд баталсан, ОХУ-ын үнэлгээ. 6-7 төрлийн барилгын ажлыг шинэчилсэн байгаа нь ОХУ. Тэрийг хуулаад, хэн, хаанаас, ямар аргачлалаар тогтоосон нь мэдэгдэхгүй, энд тэндхийн юмаар хөрвүүлээд, нэг нь нөгөөдөө тохирохгүй юмаар барилгачдын цуглуулсан нормчлолын сангийн мөнгийг үрж байгаа. Дэлхийн зах зээлийн нийтлэг жишигтэй бусад улс орон нь энэ асуудлыг шийдсэн байна. Үүнийг одоо байж байгаа төсвийн норм нэгжийг томсгоод, томсгосон үнэлгээ, томсгосон цаг хугацаатай болгоод жишиг болгоод тэрийг нь баталж өгөх ёстой. Тэрнээс өнөөдрийн яамны, БХТ-ийн зохицуулж байгаа шиг үнийг индекслээд, үнэ тогтоодог энэ балай юмаа зогсоох ёстой. Сүүлд нь энэ чинь асуудалд орно шүү. Төрийн захиргааны байгууллага нь үнийг тогтоох ёсгүй. Олон улсад шинжлэх ухаанаар батлагдчихсан, төслийн удирдлагын арга зүйгээр өөрчлөлтийг хийж, үнэ, нормыг тогтоох хэрэгтэй.   

Нийслэлийн Ерөнхий архитектор, МАЭ-ийн Ерөнхийлөгч Н.Нацагдорж: ЕРӨНХИЙ ТӨЛӨВЛӨГӨӨГ БАТЛАГДСАНЫ ДАРАА ДАГУУЛ ХУУЛИУДАА ӨРГӨН БАРИХ ХЭРЭГТЭЙ
“Газрын тухай” багц хууль, удахгүй “Барилгын тухай” хуульд нэмэлт өөрчлөлт орох гэж байна. Гэтэл энэ хуулиудыг батлуулахаас өмнө “Хөгжлийн ерөнхий төлөвлөгөө”-г бодлогоор хянадаг, жил жилийн бүтээн байгуулалт нь энэ төлөвлөгөөтэй нийцэж байна уу гэдгийг хянаж байж явдаг баймаар байна. Тэгээгүйгээс өнөөгийн Улаанбаатар хотын байгаа байдлыг та бүхэн харж байна. Тиймээс цаашдаа 2040 оны Ерөнхий төлөвлөгөөг УИХ-аар батлуулсны дараа дагуул хуулиудаа өргөн барьж, хэрэгжүүлэх талаар хэлэлцэх хэрэгтэй байна. Ерөнхий төлөвлөгөөг батлагдсаны дараа олон асуудлууд яригдана. Энэ тал дээр анхаарал хандуулаач. 

Монголын Барилгын хөгжлийн үндэсний төвийн Тэргүүн Г.Мягмар: БАРИЛГЫН САЛБАРТ ЗӨВЛӨХ ҮЙЛЧИЛГЭЭ НЭН ЧУХАЛ БАЙНА
1. Хот байгуулалтын бодлого байхгүй, бодлогын баримт бичиг ч алга. Ийм баримт бичиг батлагдаагүй нөхцөлд Монгол Улсад хаана хот суурин бий болж, хаана юу барих вэ гэдгийг яриад хэрэггүй. Тиймээс энэ тал дээр анхаараач ээ.

2. Монгол Улсын хэмжээнд техникийн бодлогын нормын асуудал нь нэгдсэн бодлого зохицуулалтай байх ёстой. Тиймээс техникийн норм, шинэчлэлийн асуудал их хоцорч байна. Тиймээс салбарын Эрдэм шинжилгээ, судалгааны байгууллага зайлшгүй хэрэгтэй байна.

3. Барилгын салбарт хэрэгжээгүй, хөгжөөгүй зүйл бол Зөвлөх үйлчилгээ байна. Үүнийг хөгжүүлж чадвал энэ салбарт маш олон асуудал шийдэгдэнэ.

4. Шат дамжлагыг багасгасан, хүнд суртлыг багасгасан, авлигын асуудлыг бүр байхгүй болгомоор байна. Барилгаа ашиглалтад өгсөн хүмүүс нь Комисс гэдэг чинь ямар байдгийг хэлээд өгнө дөө. Энэ тал дээр маш их анхаарал хандуулаарай.

Монголын Барилгачдын нэгдсэн холбооны Ерөнхийлөгч М.Батбаатар: ТӨРИЙН БУС БАЙГУУЛЛАГУУД НЬ ТӨРИЙН ЧИГ ҮҮРГИЙГ МАШ САЙН ГҮЙЦЭТГЭЖ БАЙГАА
1. Салбарын 40 гаруй ТББ байна. 5 жилийн өмнөөс төрийн чиг үүргүүдийг хэрэгжүүлэхээр гэрээг байгуулж, өнөөдрийн байдлаар нийт 21 барилгын ТББ нь төрийн чиг үүргийг хэрэгжүүлэн ажиллаж байна.

2. Тиймээс төртэй харьцаж сурч байна, төрийн итгэлийг авч төрийн чиг үүрэг, ажлыг чанартай, хүнд сурталгүйгээр, хүртээмжтэй ажиллахад холбоод нь маш туршлагатай болсон байна. Түншлэлийн хүрээнд манай ихэнх холбоод сургалтын танхимтай, сургалтын боловсон хүчинтэй болсон. Тиймээс энэ чиглэлээр төр, хувийн хэвшлийн босгосон энэ туршлагыг цаашид ашиглаад яваасай.

3. Одоо барилгын салбарт хөрөнгө оруулалт, санхүүжилтийн асуудлуудад анхаарлаа хандуулах хэрэгтэй байна.

Ийнхүү бүтэн 2 цаг гаруй үргэлжилсэн уулзалтын үеэр салбарын төрийн бус байгууллагын төлөөллүүд нь салбарт тулгамдаж буй олон асуудлуудын талаар санаа бодлоо солилцож, хууль эрх зүйг боловсронгуй болгох, сайжруулах, өөрчилж шинэчлэх асуудлууд байгааг Барилга, хот байгуулалтын Сайддаа уламжилж, шийдвэрлэх тал дээр анхаарч ажиллахыг хүслээ.

Харин Барилга, хот байгуулалтын Сайд Ц.Даваасүрэн нь цаашид яам, төрийн бус байгууллагын хооронд тогтсон түншлэлийн харилцааг бэхжүүлж ажиллахаас гадна гэрээг сунгахдаа дотоод аудитыг ажиллуулж, хариуцлагатай ажиллах шаардлагыг тавихаа илэрхийллээ. Мөн мэргэжилтэй боловсон хүчнийг чадавхжуулах хүрээнд мэргэжлийн сургалтын төвүүдтэй түншилж, хамтран ажиллах нь зүйтэй гэсэн бол барилгын тусгай зөвшөөрлийн олголтыг зөвхөн барилга барих хугацаанд нь тухайн барилгад нь олгоод явбал барилгын тусгай зөвшөөрлийг шилжүүлэн худалддаг байдал арилна гэдгийг онцолж байв.

Мөн хот байгуулалтын гол эрх зүйн баримт бичиг болох “Улаанбаатар хотыг 2040 он хүртэл хөгжүүлэх ерөнхий төлөвлөгөө”-г батлуулах тал дээр анхаарал хандуулж “Барилгын тухай” хуулиар бүрэн зохицуулагдахгүй байгаа асуудлууд, техникийн норм, нормативын бичгүүд, зургийн чанар тааруу байгаа зэрэг бүхий л асуудлуудыг судалж үзэх тухайгаа илэрхийлсэн юм. Түүнээс гадна, барилгын салбарын эрдэм шинжилгээний байгууллагагүй явах нь энэ салбарт олон асуудлыг дагуулж байгааг анхаарч энэ чиглэлээр судлахаас гадна Төрийн бус байгууллагууд нь Гишүүн байгууллага бүрдээ Хөдөлмөрийн аюулгүй байдлыг хангах, эрсдэлгүй орчныг бүрдүүлэх чиглэлээр хяналтаа чангатгах, ажилчдадаа амласан цалингаа цаг тухайд нь олгож байхыг хичээнгүйлэн хүсээд энэхүү уулзалт өндөрлөсөн байна. 

Эх сурвалж: www.barilga.mn